ХУРИМЫН УРИЛГА

Нээлттэй салхивчаар хүүхдүүдийн тоглон шуугилдах жаргалтай дуу, зуны намуухан урьхан салхитай хамт урилгагүйгээр өрөөгөөр зочилсон сайхан тунгалаг үдшийн мэндийг сайтынхаа уншигчдад хүргэе. Зуны дэлгэр цагт хуримаа хийж, тусгаар айл болон шинэхэн гэртээ биесээ хайрлан амьдрахыг тэсэн ядан хүлээж байгаа хосуудад хуримын бэлтгэлийн нөр их ажил тулгарч байгаа даа. Хуримаа хийх гэж байгаа хосууд өдөрт хэдэн мянган удаа интернэтээр зочилж мэдээлэл хайдаг болоо? гэж би дандаа боддог юм. Тийм ч учраас хуримын сайтаараа дамжуулан хосууддаа хэрэгтэй мэдээлэл зөвлөгөөг нь хүргэхийг зорьдог.

Мөрөөдлийн хуримаа хийхийг хүсч байгаа залуухан халуухан хосууд ялихгүй жижиг гэлтгүй маш олон зүйл дээр ач холбогдол өгч байж жинхэнэ төгс хуримыг хийдэг байна. Энэ удаад та бүхэндээ хуримынхаа урилган дээр бичих билэг дэмбэрэлтэй ерөөлийн сайхан үгсийг хосууддаа зориулан нийтэллээ. Эдгээр сайхан мөртүүдээс өөрт таалагдсанаа сонгоод, завтай бас гарын уртай бол хосууд өөрсдийн гараар хуримын урилгаа бэлдэх нь хамгийн төгс хувилбар байж болох юм... Харамсалтай нь хурим хаяанд ирсэн байхад тэр олон хүний урилгыг хоёулахнаа гараараа урлана гэдэг жинхэнэ мөрөөдөл...

Гонсойх хэрэггүй ээ... Азаар таны сэтгэлийн илэрхийллийг өнгө будаг, үг үсэгтэй нь алтан утсаар мөнгөн цаасан дээр буулгах олон газар Монголд бий.

Манай сайтаар зочилсоноор хүссэн газраараа дахин давтагдашгүй цор ганц урилгыг хийлгэж зочидоо урих боломжтой.

Урилган дээр бичигдэх үгс, сонгох өнгө, чанар ирэх зочидын сэтгэлийн утасыг хэр хөндсөнөөс хосуудад ирэх бэлэг шалтгаалж болох талтай гэвэл хэтрүүлэг үү? гэхдээ л бодууштай шүү хосуудаа...

 Манай сайт хуримаа хийхээр төлөвлөж байгаа хосууддаа цувралаар зөвлөгөө мэдээллүүдийг хүргэж байгаа. Энэ удаа бид "БРЭНД МЕДИА ГРУПП"-ээс эх сурвалжийн аваад хосууддаа хуримын урилган дээрээ бичих ерөөлийг үг, шүлэг хүргэж байна. Та бүхэнд хэрэгтэй мэдээлэл байх болов уу?

1     Хорвоо дэлхийн уудамд

       Хос хун шиг амьдрах гэж

                    Хоёр биенийхээ аав ээжийг

                    Хамгаас илүү халамжлах гэж

                            Хонгор үрсийнхээ зулайг

                            Хоёул зэрэгцэн үнэрлэх гэж

                            Хорвоог туулах хамтын амьдралаа

                            Хотол түмэндээ гэрчлэн андгайлах гэж

                   Хурим найрын ёслолын хойморт

                   Хүндэт таныг урин залъя

                   Гэгээн тэнгэрлэг их хайрын минь

                   Гэрч нь болж Та минь залраарай

*********************************************************************************

2       Ерөөл учрал бүрдсэн

         Ертөнцийн энэ сайхан өдөр

         Хаан бугуйвчаар жаргал нэгтгэж

         Хатан сүйхээр заяа зангидаж байна

                        Өвгөдөөс уламжлагдсан ган тулганд

                        Өөдөө бадарсан галаан асааж

                        Өрхөн дээр цугласан долоон бурханд

                        Өлгийтэй үрийнхээ дууг сонсгохоор

                        Айл боллоо бид хоёр

          Золгон учирсан энэ өдрөөс

          Зочин таны сайхан ерөөлөөр

          Ургийн холбоо батжих болтугай

          Удмын өлзий дэлгэрэх болтугай

******************************************************************************

3        Ховор эрдэнийн үнэтэй          

          Залуу сайхан нас

          Хосоор амьдрах жамтай

          Замбуу тивийн ёс

                Насанд энхжин, жарган дэлгэрэхийн

                Хишиг буян, ерөөлийг айлтган

                Наран хотолсон халуун голомтдоо

                Хүндэт зочдоо өөдөө залъя!

******************************************************************************

4           Тоонот гэрээн барьж

             Тогтуун жаргалтай амьдарюү гэлээ

             Тулгандаа галаан бадрааж

             Түвшин жаргалтай амьдарюү гэлээ

                         Өргөө гэрээн барьж

                         Өнөд жаргалтай амьдарюү гэлээ

                         Үүрдийн ариун хайраар

                         Үрсээ өсгөн мөнхөрюү гэлээ

******************************************************************************

5           Өвгөдийн шийрлэсэн хасагт тулганд

             Өөдөө цоролзсон галаа өрдөж

             Өрхөн дээр цугласан Долоон бурханд

             Өлгийтэй үрийнхээ дууг сонсгохоор

             Айл боллоо бидэн хоёр.